കോവിദഃ' രണ്ടാം അധ്യായം-ഒരു അനുബന്ധ പാഠം :1
[തയ്യാറാക്കിയത്:
ചേറ്റൂർ മോഹൻ]
സമാസം
ഒന്നിലധികം പദങ്ങൾ
ചേർന്ന് ഒറ്റ പദമായി മാറുന്നതിനെയാണ് സമാസം എന്ന് പറയുന്നത്. അവയെ ആദ്യമായി നാല് തരമായി
തിരിക്കാം.
പട്ടിക-I
1. തത് പുരുഷഃ
2. ദ്വന്ദ്വഃ
3. ബഹുവ്രീഹിഃ
4. അവ്യയീഭാവഃ
തത് പുരുഷ: സമാസത്തെ
നാലാക്കി വീണ്ടും വിഭജിച്ചു;
കാണുക:
പട്ടിക-II
1. തത് പുരുഷഃ (സാമാന്യ)
2. കർമധാരയഃ
3. ദ്വിഗുഃ
4 നഞ് പ്രഭൃതയഃ
(നഞ് തുടങ്ങിയവ)
ഇവയിൽനിന്നും നാലാമത്തെ
ഇനം ഒഴിവാക്കി ആദ്യത്തെ മൂന്നെണ്ണം മാത്രമെടുത്ത് പട്ടികതാഴെക്കാണും വിധം പുതുക്കി:
പട്ടിക-III
തത് പുരുഷ:- 1. തത്
പുരുഷഃ (സാമാന്യ)
2. കർമധാരയഃ
3. ദ്വിഗുഃ
4. ദ്വന്ദ്വഃ
5. ബഹുവ്രീഹിഃ
6. അവ്യയീഭാവഃ
പട്ടിക-III -ൽ ഉള്ള
ആറ് സമാസങ്ങളാണ് നമുക്ക് കോവിദഃ-യിൽ പഠിക്കാനുള്ളത്. ഇവയിൽ ഓരോന്നായി ഇനിയുള്ള
പാഠങ്ങളിൽ പഠിക്കാം.
കോവിദഃ' രണ്ടാം അധ്യായം-ഒരു അനുബന്ധ പാഠം :2
[തയ്യാറാക്കിയത്:
ചേറ്റൂർ മോഹൻ]
സമാസം
-ചില പൊതു നിയമങ്ങൾ:
1. ഒന്നിലധികം
പദങ്ങൾ ചേർന്ന് ഒറ്റ
പദമായി മാറുന്നതാണ് സമാസം. (ഉദാ:
വൃക്ഷ, മൂലം= വൃക്ഷസ്യ മൂലം=
വൃക്ഷമൂലം; ചോരാത് ഭയം=ചോരഭയം)
2. ഇത്തരത്തിൽ ഉണ്ടാവുന്ന ഒറ്റ പദങ്ങളെ സമസ്തപദങ്ങൾ
എന്ന് പറയുന്നു. (ഉദാ: വൃക്ഷമൂലം- )
3. സമസ്തപദത്തിന്റെ ഘടകപദങ്ങളിൽ ആദ്യത്തെ പദത്തെ പൂർവ്വപദമെന്നും രണ്ടാമത്തെ പദത്തെ ഉത്തര പദമെന്നും പറയുന്നു. (ഉദാ: വൃക്ഷമൂലം = വൃക്ഷ-എന്നത് പൂർവ്വപദവും ; മൂലം എന്നത് ഉത്തരപദവുമാണ്)
4. ഇത്തരത്തിൽ ഒറ്റ പദമായി മാറിയ
പദത്തെ പിരിച്ച് അർത്ഥം വിശദീകരിക്കുന്നതിനെ- അതായത് സമാസത്തിന്റെ നേരെ വിപരീതം ചെയ്യുന്നതിനെ-
വിഗ്രഹം എന്ന് പറയുന്നു. (ഉദാ:
വൃക്ഷമൂലം = വൃക്ഷസ്യ മൂലം; ചോരഭയം= ചോരാത് ഭയം)
5. പൊതുവെ സുബന്തങ്ങൾ -അതായത് നാമപദങ്ങൾ- തമ്മിലേ സമാസം നടക്കുകയുള്ളൂ; (തിങന്തങ്ങൾ
-ക്രിയാപദങ്ങൾ- തമ്മിലോ
സുബന്തവും തിങന്തവും ചേർന്നോ സാധാരണയായി സമാസം വരില്ല.)
6. ഒന്നിലധികം നാമപദങ്ങൾ ചേരുമ്പോൾ ഒരു മാലയെന്നോണം കോർത്തു
കോർത്തു സമാസം വരും (ഉദാ:രാജപുരുഷാഗമനം:
രാജ്ഞ: പുരുഷ:= രാജപുരുഷ:; രാജപുരുഷസ്യ ആഗമനം= രാജപുരുഷാഗമനം)
7. പരസ്പരം ബന്ധമുള്ള നാമപദങ്ങൾ-തമ്മിലേ സമാസം
നടക്കുകയുള്ളൂ;(ഉദാ: രാജപുരുഷസ്യ ആഗമനം=
രാജപുരുഷാഗമനം- വരുന്നത് രാജപുരുഷനാണ്; അതുകൊണ്ടാണ് ആ രണ്ടു പദങ്ങൾ
തമ്മിൽ സമാസം ഉണ്ടാവുന്നത്)
8. സമാസത്തിൽ ഉൾപ്പെട്ട പൂർവ-ഉത്തരപദങ്ങൾ പ്രാതിപദികത്തിന്റെ രൂപത്തിലാണ് ഉണ്ടാവുക. അതിനാൽ അവയെ കൂട്ടിച്ചേർക്കാൻ വിഭക്തി ഉപയോഗിക്കണം. (ഉദാ: ശാസ്ത്രേ(സപ്തമീവിഭക്തി) നിപുണ: (പ്രഥമാ വിഭക്തി=ശാസ്ത്രനിപുണ:)
കോവിദഃ' രണ്ടാം അധ്യായം-ഒരു അനുബന്ധ പാഠം
: 3
[തയ്യാറാക്കിയത്: ചേറ്റൂർ മോഹൻ]
സമാസം-തുടർച്ച
സമാസത്തിൽ
പൂർവ്വപദവും ഉത്തരപദവും ഉണ്ടെന്നു നാം കണ്ടുവല്ലോ. ഈ
രണ്ടുപദങ്ങൾക്കും തനതായ അർത്ഥം ഉണ്ടാകും
എന്നും നമുക്കറിയാം. സമാസത്തിൽ നാലു തരം സാധ്യതകൾ ഉണ്ട്.
1 പൂർവ്വപദത്തിനു
പ്രാധാന്യം ഉണ്ടാവുക; (അവ്യയീഭാവഃ)
2 . ഉത്തരപദത്തിനു
പ്രാധാന്യം ഉണ്ടാവുക; (തത് പുരുഷഃ)
3. പൂർവ്വ-ഉത്തരപദങ്ങൾ അല്ലാതെ മറ്റൊരു-അന്യ-പദത്തിന് പ്രാധാന്യം
ഉണ്ടാവുക; (ബഹുവ്രീഹിഃ)
4 . പൂർവ്വ-ഉത്തരപദങ്ങൾക്ക് തുല്യപ്രാധാന്യം ഉണ്ടാവുക; (ദ്വന്ദ്വഃ)
ഇങ്ങനെ
വ്യത്യസ്തമായ അർത്ഥതലങ്ങൾ ഉണ്ടാവുമ്പോൾ നാം ഏതു പദത്തിന്റെ
പ്രാധാന്യമാണ് സമാസം നിർണയിക്കാൻ എടുക്കേണ്ടത്
എന്ന ഒരു സംശയം ന്യായമായും
വരാം. ആ പദമേതെന്നു കണ്ടുപിടിക്കാൻ
ഒരു ഉപായം പറഞ്ഞുതരാം:
ഈ
സമസ്തപദം ഉൾപ്പെടുന്ന വാചകത്തിൽ ക്രിയാപദം ഉണ്ടായിരിക്കും. ആ ക്രിയാപദവുമായി ഏറ്റവും
ബന്ധമുള്ള പദം ഏതെന്നു നമ്മൾ
കണ്ടുപിടിക്കണം. അത് മേലേക്കൊടുത്ത നാല്
നിബന്ധനകളിൽ ഏത് ഇനത്തിൽ പെടുന്നു
എന്ന് നോക്കി ഏതു സമാസം ആണെന്ന്
നിശ്ചയിക്കാനാവും.
ഒരു
ഉദാഹരണം നോക്കാം. सीतापति: गछति
। ഇവിടെ सीताया: पति:
എന്നാണു വിഗ്രഹവാക്യം. ശ്രദ്ധിക്കേണ്ടത് ആരാണ്-സീതയാണോ, സീതയുടെ
പതിയാണോ-പോകുന്നത് എന്നതാണ്. ഇവിടെ
സീതയല്ല; അവരുടെ പതിയാണ് പോകുന്നത് എന്ന് നമുക്കറിയാം. ‘ഗച്ഛതി’
എന്ന ക്രിയയുമായി സീതയേക്കാൾ അടുപ്പം അവരുടെ പതിയ്ക്കാണ്. അതിനാൽ സീതാപതി എന്ന സമസ്തപദത്തിൽ ഉത്തരപദമായ
പതിയ്ക്കാണ് പ്രാധാന്യം. ഈ അറിവ് മേലേക്കൊടുത്ത
പട്ടികയുമായി ബന്ധപ്പെടുത്തിയാൽ ഇത് ഏതു സമാസമാണെന്നു
അറിയാം. ഒന്ന് ശ്രമിക്കൂ...
ഇനി
നമുക്ക് ഓരോ സമാസങ്ങളെക്കുറിച്ച് പഠിക്കാം.
(തുടരും...)
